Ua taualuga ma faaiuina i le aso sasa ma faafiafiaaga o le 16 aso o polokalame faagasolo a le Matagaluega o tina ma tamaitai, e ala i le taofia o sauga e faasaga i tina ma tamaitai.
O le faamoemoe lea ua auga tasi uma i le autu e faapea o le faaaloalo o le matafaioi lea a tagata uma.
Sa faasolo i tua i nuu ma afioaga nisi o polokalame faalauiloa a le Matagaluega ae o nisi foi o faalapotopotoga i Upolu nei, e aofia ai ma le faalapotopotoga o tusitala ma faasalalau.
O le manulauti o lenei faalauiloa na amata mai le vaiaso mulimiuli o le masina o Novema seia faamaea i le aso, o le taumafai lava ea faamuta ma taofia loa soo se ituaiga sauaga o loo aafia ai tina ma tamaitai.
I suesuega sa faatino ile 2018, o loo manino ai le tele o le faafitauli o loo feagai nei ma Samoa i le Sauaina o Tina ma Tamaitai.
I le itu o tamaiti e tusa ma le 87% e aafia i sauaga i totonu o aiga, 86% e aafia i sauaga o le kiki, tu’i ma isi sauaga.
E 9.5% o tamaitai e ripoti mai sa faamalosi e le tagata lava o lona aiga.
Mo tagata matutua, 86% o tina ma tamaitai nofotane sa aafia i sauaga pei ole kiki, tu’i ma le faaaogaina o mea malo e fa’aoo ai sauaga; 87% o tina ma tamaiti sa aafia i lea suesuega e sauaina e ala ile ee ma le faaaogaina o upu malolosi,
Ae 24% o tina ma tamaitai sa sauaina e ala ile titinaina ole ua, 87% o tamaitai sa faaoo ai le fa’afefe ma sauaina ile tino.
O le agaga o le malo ia galulue faatasi matua ma tagata matutua o le atunuu e taofia nei uiga mataga.
