Ua molimauina le toe galueaina ai nei o le malaevaalele i Fagalii ma le faamoemoe e toe tatala ise taimi lata mai.
Na saunoa ai le afioga ile Minsita o Galuega tetele, ma Malaevaalele, Afioga a Olo Afoa Fiti Vaai ise tatou faatalanoaga , talu ai, ole manaoga lena o le Matagaluega ina ia toe tatala Fagalii, e le gata ina faafaigofie ai feoaiga ile va o Amerika Samoa ma Samoa nei, ae o tupe maua mai vaalele taunuu, faapena foi ile au faipisinisi faaaogaina le malaevaalele.
Taimi nei, e faitau miliona tala nisi tupe e faaalu e le matagaluega, ina ia mafai ai ona toe tino ma le malaevaalele I Fagalii, e le gata o le toe faaleleia ole malae e sesee ai vaa, o le fale o iai ofisa e taunuu iai vaalele, ma lona tulaga ia ausia tulafono faalesoifua maloloina, ma le saogalemu, ae o pisinisi e faia le tautua masani mo malaevaalele faalevaomalo.
Ole tausaga talu ai sa fuafua le pulega o malae vaalele e toe tatala ai Fagalii, peita’i na faasolosolo mai lava laasaga e toe agavaa ai ona tatala.
E ui ina sa laga foi ni faitioga mai le itu o agaia le malo, e le’o toe saogalemu ona tulaueleele ni vaa I Fagalii.
Peita’i o saunoa le Olo, na mafua ona tapunia le malaevaalele, ona o le tulaga tau I avanoa e tulaueleele ai vaa ile malae.
O le tatala ai ole malaevaalele i Fagalii, o lesi foi lena vaega o tapenaga a Samoa mo ana taligamalo I le fono a taitai o malo ole tapulega ile tausaga fou.
Ose taimi ile faaiuga o le masina nei o fuafua e oo atu iai ua toe tatala Fagalii, ma o le’a toe pa’u ai foi pasese vaalele mo tagata femalagai.
Ae ua fetaui foi ma le aiaiga faafaigofie o pemita feoa’iga faapisinisi atu o tagata Samoa mo Tutuila.
