Ae ile taulaga i Apia ile Aso Toonai na faate’ia ai taaavale feoai ae o aiga tuaoi, ile sasao ane i luga o le Maota ole PSA Public Service Association i Fuagalei, ile taeao, a’o pisi faatauga ole faaiuga o le vaiaso.
Na vave oo atu ofisa Fui mu ma faatonutonu le sosolo, ma faasaoina ai pisinisi tuaoi, ma aiga o lena vaiaai.
Peita’i o le maota lea ole PSA e fausia i laupapa, o fausaga o aso la, ua faitau tausaga foi e le’o toe nofoia pe faaaoga e nisi.
Ma na tatou fesiligia se tasi sui ole PSA o taimi a’o faaaoga le maota lea, le afioga ilea lii Faipule, Aupito Viliamu Sio, po o ai e ana ia le maota ma le fanua, i lana tali tusitusia:
“o le Fanua ma le Fale sa faatau mai tupe foai (poo donations) a tagata faigaluega sa avea ma sui auai i Samoa ma tupe foa’i foi mai tagata faigaluega o sui o Iuni a Tagata Faigaluega fa’avaomalo (international trade unions).
Ao faigaluega ai ma avea ma Faiaoga ale PSA (Education Officer) i le tausaga 1992, ua iai le fanua ma le fale. O le vaitaimi lena a’o avea Koroseta To’o ma Fa’atonusili o le PSA, a’o le afioga ia Peseta mai le Matagaluega o Aoga o avea ma Ta’ita’ifono.
O lenei fale o le fale sa faatino ai polokalame aoaoga mo le aufaigaluega ua avea ma sui auai o le PSA faapea ma tagata faigaluega mai le private sector ua avea ma sui o le Iuni.
O le aoga lena ma le taua o le fale. Ia iai se Ofisa Tutotonu e potopoto iai tagata faigaluega ma faamautu latou tapegapegana mo le saiiliga manuia mo tagata faigaluega.
E lagona le faanoanoa pe afai ua mu lea fale. Aua i le faavae poo le Constitution o le PSA, afai e le mafai ona faaogaina le fale ma le fanua e tatau ona foai i seisi faalapotopotoga e tutusa talitonuga ma ona faavae”
O le mu o le maota lea o le PSA ile Aso Toonai, na taua e le aiga e ana le pisinisi i autafa, e faafetai lava ile galuega a le Fuimu, ua le afaina atu ai ma latou fale ae ole faleoloa ma aiga ilea vaiaai.
