O le ogaoga o lea mataupu ma le feeseeseaiga i totonu ole nuu, na i’u ai ina faia faasalaga ma faatete’a ai se vaega o matai.
O le Aso 29 o le masina lenei e valaau ai le mataupu lenei i le Ofisa o le Faamasinoga i Tuasivi mose feiloaiga.
Sa le mafai ona talanoa auilili mai le Afioga ia Patele Pio Galumalemana, ole sui Epikopo o Upolu, ina ua tatou fesiligia, ile mataupu lea ona faapea e na’o le Archbishop e mafai ona talanoa i le mataupu lea.
Peita’i na ia faamaonia mai, o le mea lava tau i le lotoifale, e le’o le Ekalesia, o le latou lava lotoifale va faaleaiga, ae ua nini mai ai ma le lotu. Ae o loo taatia ai sei faamoe le toa.
I faamaumauga o i tonu i Lelatele lea na taunuu iai le lotu, ile silia i le 170 tausaga ua tuana’i, ma o loo tapena mo le lotu faamanatu.
Peitai, ua faamaonia mai foi e le afioga a Patele Pio, ua aveese le Patele ma le Tiakono mai le lotu i Samalaeulu. Taimi nei ua nofo le Afioga i le Patele i totonu o Mauga, ae faapena foi i le Tiakono i lona aiga.
Ae o le tala mai totonu, ole nuu, o le Aso Gafua 12 o Setema, na fai ai le fono a matai o le afioaga ma faasala ai lesi matai ia Vaifale Sepekio.
O molimauina mai foi ole mataupu lea ua leva.. Sa taofi le matai e aua le toe faia lesi lotu faaopopo i lona maota, ae sa faaauau lava, ma latou talosagaina ai le Afioga Patele mose latou misasa ma kofesio.
Ma sa faapena ai lava ona fai, ona ole talosaga ale itu i Sasa’e o le Ekalesia, ua fai si faigata ona faaauau le totogi o le pasi e o ane ai, i le misasa, $80 tala lava ile Aso Sa.
Peita’i sa alu alu lava, ae ua le fiafia ai loa se vaega o le aulotu ma leai ai loa se felagolagomai na maua. O le mea ua tupu, ua momoli e lesi suafa, ole auaiga lava le mataupu lea i le fono ale Nuu, ole Aso Gafua 12 Setema, ma faasala ai loa le matai e ana le maota na fai ai le lotu i Sasa’e i le 30 aumatua.
Na ta’ua foi le tatou paaga mai totonu, o taofia lona suafa ona o puipuiga i faasalaga ale nuu, : “O le mataupu lea i le tau o feoaiga na fai ai lava le misasa i le pito i Sasa’e ae afio iai Patele I Aso Tofi. Ma e fai lava le aulotu i lesi pito nuu. ae tasi lava le matagaluega, pau le eseesega o le taimi o le misasa.
Peita’i ua maua ai le feeseeseaiga ile va o matai ole aiga, o lesi o le Taitaifono, ae o lesi o lona maota ua faatu ai le Ekalesia i Sasa’e.
Ma oo ai le mataupu i luma o le nuu, lea na faasala ai loa Vaifale Sepekio. E iai lesi foi matai o le nuu ua faasala foi e afua mai lava ile mataupu lea pei ona molimauina mai.
Ole Aso Tofi 22 Setema sa oo atu ai Afioga i Sui Epikopo, o Upolu ma Savaii, i Samalaeulu. O le Aso Tonu foi lea na taunuu ai le Tala lelei Malaetele ma Gafoaga, pei ona molimauina mai e le tatou paaga. O le aso tonu foi lea ua faapa’ia ai le aulotu lea i Sasa’e. O le igoa o Maria le Tina o Puapuaga. O le Misasa na osi e faapa’ia ai le aulotu i Sasa’e. Ae ole aso tonu foi lea ua foi sui Epikopo, ma afio foi Patele.
Ae tu ane le tootoo ole nuu , e tafi ese ia Vaifale Sepekio, ma lona auaiga ma le nuu. Na logo le Pule o le Matagaluega ma le Tama o le Pule’aga ile faaletonu ua tupu.
Ma ia valaaulia ai loa le Afioga ile Patele e afio i Mauga e tausi Mauga, ae alu le Tiakono i lona aiga. O le falelua lea i Samalaeulu ma Mauga sa tasi lava le Patele na ia tausia, ae talu ai ua aveesea mai le Eukalasikia ma le malumalu i Samalaeulu ma avatu le Patele i Mauga, ua leai ai foi mase lotu a le ekalesia i le nuu lea, o le taunuuga o le faatonuga mai luga.
Molimauina mai le tatou paaga i Lealatele, le talia ma le fiafia e le Ekalesia i Mauga o le Afioga ile Patele, ma ua fai ai galuega faamama ile maota o le Tiakono a Mauga ua ofo ane mapu iai Patele.
Manatua lele e le tatou paaga, e le’o se taimi muamua lea ua faaletonu ai se failotu i le nuu lea. Maitauina e ono isi Ekalesia ua faatuina i totonu o le afioaga o Samalaeulu.
Ae, O le mataupu lea i le va o le Matai ma ona auaiga, lea ua faate’a ese male nuu , ua oo atu i le Tulafono poo le Faamasinoga, ole aso 29 o le masina nei , e valaau ai le latou feiloaiga i le Ofisa ole Faamasinoga i Tuasivi.
