Ua taatia atu ai nei le talosaga tagi a matua o Tuuau Maletino, ile Ofisa o Sulufaiga a Samoa, Ombudsman, mo le suesueina ole faatinoga e leoleo ole maliu o Tuuau Maletino.
O le mataupu lenei ile maliu lilo o Tuuau Maletino, ua savali ai nei ile tolu tausaga o toso.
Peita’i pau lea ose maliu lilo, pei ona molimauina, ole po ole aso 21 o Aperila na lavea ai Tuuau, ae lua aso mulimuli ane faatonu e leoleo le aiga, ua taga ona o e faataele ma ave loa e teu.
E ave Tuuau i tua, e teu, ae mulimuli ane faalauiloa e le Komesina o lena taimi, faapea ua iai le tagata ua masalomia, peitai na toe molo’aua.
Taimi nei ua faagasolo faamasinoga i isi mataupu e sootaga ile maliu o Tuuau, ae le’i maua lava poo ai na maliu ai le atalii.
O ananafi na sulufa’i atu ai matua o Tuuau ile ofisa o Sulufaiga , talu ua latou fesiligia le faiga ole suesuega a leoleo.
Taimi nei ua leai se alia’e i luga o le suesuega faasaga ile Hit and Run, ae ua faia suesuega ia Samuelu ma lona toalua , sa la momoli atu i leoleo molimau ole mea na tupu, ma la molimauina.
E ui ina fai le iuga a le Matagaluega o leoleo, e leai se faamoniga o na molimau a Samuelu.
E oo lava ile MInsitai o leoleo, ua ia folafola ile Palemene, lona lagolagoina o le faaiuga ole suesuega a leoleo.
Peita’i o le vaiaso talu ai na toe oo atu ai leoleo i matua o Tuuau, mo se faua, saliva, mo latou suesuega. Ae molimau le tina ole aiga, o latou fesiligia poo fea ua ave iai lavalava o Tuuau oloo pisipisia ile toto.
O le aiga o le alii aoga ia Tuuau Maletino, sa faatino foi la latou suesuega tumaoti, ma avatu uma faamaumauga ile ofisa o leoleo Faleata i lena taimi, e ui ina sa faatonu e leoleo le aiga, ile lua aso talu ona maliu Tuuau, ua taga ona ave i tua e teu.
O molimauina foi e le aiga, le logo atu o latou ua maua le tupe mai le ofisa o taui mo faalavelave faafuasei, e fesoasoani ile maliu.
Peita’i na faato’a teu le atalii, ile aso 1 o Me 2021, tusa ole vaiaso talu ona maliu.
Ole sulufai atu o matua o Tuuau Maletino i le ofisa o sulufaiga, ile vaiaso nei, ua talia ai nei se tali, peitai e oo mai nei, e le’i maua lava se Komesina o le Ofisa o sulufaiga.
Ina ua faamavae le tamaitai muamua na ia umia lea tofiga, Luamanvao Katalaina Sapolu, talu mai Aperila 2021.
O le masina o Iuni ole 2023 na amata ai ona avanoa le nofoa ole Komesina o Sulufaiga.
