Ua molimauina mai e toa lima ua aafia i le siama koviti19 ile motu o Manono, ae o loo manuia lava Apolima.
Maitauina foi le televave ole sosolo o le siama i Savaii ina ua tatala femalagaiga a vaa ile motu tele.
Ua oo atu ai nei i le 525, ae 6,201 i latou i Upolu. Ae i le tatou atunuu atoa, o loo silisili ona toatele tamaitai pisia ile siama koviti nai lo alii.
Ile faitauga tuufaatasi ale Matagaluega o le Soifua Maloloina, ole 24 itula i totonu o le aso18 i le aso 19 o Aperila, e 3,825 tamaitai, ae 2,906 alii.
Peita’i e le’o toe atoa se 10afe o tagata 18 tausaga i luga le matutua o loo totoe e lei faia tui lona lua, faatusa ile aofai oi latou ua uma tui muamua, ua 121,606.
Ole booster e na’o le 59,759 tagata ua uma latou tui lona tolu. Ole tala fiafia, e leai se isi na maliu i totonu o le 24 itula ta’ua i luga.
Vagana ai le faaopopoga o tagata pisia 485.
Ua si’itia ai nei i le 6,731 i latou ua a’afia i le atunu’u lautele talu mai le pepesi ai i tua i le aso 17 o Mati 2022.
