Ua maea faamanuia atu le malo ma le atunuu i le aumalaga poo le au ta’a’alo a Samoa e silia ma le toa 400, o le a auai i taaloga o le Pasefika 2023 i Honiara i Solomona.
Na tauala atu le upu faamanuia ma le faamalosiau i le sui Palemia o Samoa le afioga ia Tuala Tevaga Iosefa Ponifasio i tama fanau o lea fai ma avefua o Samoa i taaloga eseese e 24.
“A’ō lenei taeao ma lona fa’amoemoe, ua silamiō le mamalu o Samoa ile Savali fa’aalaoalo a le Team Samoa. E tusa ma le 332 alii ma tamaitai ta’a’alo ma le Pulega e 101. A tu’u faatasi o le aofai ole Team Samoa e 433, ile aofa’iga o ta’aloga e 24”
“O avefu’a ia a Samoa o le’ā masii atu i Honiara, Solomon Islands, latou te finau i totonu o fa’alagamaea nei o Ta’aloga o le Pasefika lona 17, talu ona fa’avae mai ile tausaga 1963”
“I le fā o tausaga taluai, ile 2019, sa talimalō ai Samoa i Taaloga o le Pasefika, ma sa molimauina ai se tulaga maualuga o le fiafia, ma le taupati mai o Malō ‘ese’ese o le Pasefika, i Samoa nei”
“Sa molimauna foi le tulaga aloaia o Samoa ile tulaga 3 mai le 24 o atunu’u ole Pasefika. Ae maitauina ile 332 o tagata ta’a’alo, e 55% o i latou o le itūpā o ali’i, ae 45% ole itūpā o tama’ita’I”
“O se tulaga taua lenei, auā le sao o tama’ita’i i totonu o ta’aloga ma ona atina’e. Aemaise o le amanai’a o tagata-nu’u uma o Samoa.
“O le vaiaso fou o lea amata faagasolo ai loa ona tuua e auvoli polo a alii ma tamaitai, o le kegisi, o le au fusu, au lakapi, siisii uamea mamafa, fagafaga fulu a’u, ma le tele o isi taaloga o loo iai sui o Samoa ua tapena ai.
Oi latou foi na ua lava tapena, o le tomai ma le iloa e ala i toleniga sa faia aua le faatinoina o taaloga ua agavaa iai.
O le upu faamalosi a le afioga i le sui Palemia, ia outou taaalo ma le iloa ma ia fai le mea gata ai le malosi,”
“Ia manatua le Atua i taimi uma, ma aua nei galo le tapuaiga a Samoa, o outou aiga, uo ma e masani o lea taputapuai atu ao outou alo faiva”
O Samoa sa tulaga 3 i taaloga o le Pasefika lea foi sa talimalo ai Samoa i le 2019, peitai e amatalia taaloga i le aso 17 o le masina lenei seia aulia le aso 10 o le masina fou.
