Ua fa’amaonia e le Matāgaluega o le Soifua Mālōlōina le pesia ai o i latou fou e to’a 268 mai le mamalu lautele o le atunu’u i totonu o lenei 48 itula mai le 2:00 i le aoauli o le Aso 08 Me 2022 aga’i le 2:00 i le aoauli o le Aso 10 Me 2022.
Ua si’itia ai i le 11,237 le aofa’i o i latou ua a’afia i le siama o le Koviti – 19 i Samoa talu ona sao i tua le fa’ama’i i le Aso 17 Mati 2022. E to’afa (4) gasegase o lo’o taofia nei i le Falema’i i Moto’otua.
AOFA’I O E UA MĀLILIU I LE KOVITI – 19
Ua fa’ailoa fo’i e le Matāgaluega o le Soifua Mālōlōina, e to’atasi (1) le maliu fou ua fa’amauina i totonu o lenei 48 itula, ma o le ua maliu o se tinā 59 tausaga le matua, e i ai ona gasegase tumau ma e le’i faia fo’i sona tui puipui o le Koviti – 19. Ua atoa ai nei le to’a 24 o e ua māliliu i le atunu’u ona o āuga o lenei fa’ama’i.
E momoli ai pea fa’amaisega ma fa’amafanafanaga mai lo tatou Mālō ma Samoa atoa i ‘āiga ma fanau pele o e ua tu’ua le mafutaga ona o le malaga a le maliu ma le oti. I le fa’aaloalogia ma le amana’ia o tau ‘āiga o i latou nei, o le a leai ai se isi fa’amatalaga fa’aopoopo mai lo tatou Mālō.
E toe saga fautuaina ai pea le mamalu o le atunu’u ina ia faia tui puipui o le Koviti – 19 auā o le puipuiga sili lea mo tagata uma e tete’e atu ai i lea fa’ama’i mata’utia. Ia tausisia ma usitā’ia le faia o tali fofoga ma le nofo ma le tutū mo le 2 mita mai le isi tagata aemaise i nofoaga faitele.
Manatua, afai ua e fa’alogoina ua e fa’ama’ima’i ma ua e masalomia lou a’afia i āuga o lenei siama, ia tautuanā fa’anofoesea i se vaega fa’apitoa o lou fale taumamao mai tagata o lou ‘āiga. O la tatou matāfaioi tau’ave fa’atasi, o le galulue feoeoea’i e puipuia i tatou mai lenei fa’ama’i, ae silisili ai ona puipuia i latou e pele iā te i tatou.
