Ua siitia ai nei le sao o Samoa ile faatuputupulaia o laau ma meaola faalafuā, ae o kasa oona e afua ai suiga maaleale ole tau, pei ona saunoa faalauaitele mai e le Minisita ole siosiomaga, afioga a Toesulusulu Cedric Schuster ile faaiuga ole vaiaso.
Ole lipoti o suesuega ole siosiomaga 2023 faatasi ai ma le fuafuaga autu mo galuega faatino a le vaega maoti ole siosiomaga 2023-2027.
Saunoa Toesulusulu ” E ui lava ina itiiti ma faatauvaa le sao o Samoa i ia kasa oona pea fua ile lalolagi, peita’i ua siitia lava lo tatou sao i lea vaega.
Ole lona fa lea o lipoti e faailo ai le tulaga o iai lo tatou siosiomaga, e ta’i sefulu tausaga ma faatino, na amata mai ile 1993, aemaise ia o gatasi ma le taiala ole atinae o Samoa 2022-2026 ua faataoto e le malo.
O faafitauli ogaoga ua afua mai ona o aafiaga o suiga ole tau e aofia ai le faaitiitia ole ola faanatura o meaola ma laau, faatasi ai ma le afaina mai faaiuga soona fai a le tagata, ua mautinoa ai le moomia ona faaauauina pea o suesuega nei i totonu oni vaitau puupuu, e fautuaina ai faaiuga fai, aemaise taiala a le malo ma vaega maoti.
Ole ala lea ua manatu ai olea faia le iloiloga ma le suesuega lenei mo le ta’i 5 tausaga e amata atu ile lipoti lenei.
Ua manino mai i lenei lipoti, oloo ise tulaga feololo le maloloina ma le saogalemu o lo tatou siosiomaga, pea fua i faailoilo ua faaaogaina e iloilo ai le siosiomaga faanatura, siosiomaga fausia faale tagata, ole tulaga ole tau, li’o ola ole lalolagi ma faalavelave matautia faanatura, suiga ole tau, faaitiitia o aafiaga o suiga ole tau faapea le faafoeina o lo tatou siosiomaga ma galuega faatino.
Ole aotelega o suesuega faapea, ole maua lea ose tala fiafia ua mafai ona siitia ma faaleleia le siosiomaga ma soifua o tagata nuu. Ole fuafuaga autu o galuega a le vaega maoti 2023-2027, oloo faataatia ai le alafua, o faatinoga ma faamuamua e ao ona tatou galulue ai, ina ia foia faafitauli, faaleleia atili galuega faatino, ma ia puipuia le saogalemu ma le lelei ole siosiomaga i ona vaega eseese e pei ona faailoa mai ile lipoti o suesuega.
