Talu ai o le oo atu i le $67 miliona tala le tupe na faamatuu atu e le taitaifono o le SNPF ma le komiti faafoe i lalo o pisinisi e ono sa talosaga i totonu o le iva masina, ua taofia ai nei le toe faia o nonoga tupe poo loans a pisinisi, sei vagana ai nonoga tupe laiti (short term loans) ma entitlement a tagata fai saofaga, e pei ona faamanino mai e le Minisita o tupe.
O le mataupu o loo tuuaia ai le taitaifono le susuga ia Papalii Panoa Tavita Moala ma lana Komiti faafoe na faaoo atu e le Pulega poo le Board a le SNPF i le Minisita o Tupe e aofia ai ma le tusi è faalautele atili ai lo latou popolega i auala na faaoga e Panoa e faamatuu ai lenei vaega tupe tele.
E $13 miliona le SIDSAC, $4 miliona le Pure Water, $4.3 miliona le Niu pharmacy, Samoa Bearings $11 miliona, Dr Alec Ekeroma $2.1 miliona tala, Sheraton $22 miliona tala.
Peitai saunoa manino le Minisita o tupe le afioga ia Lautimuia Afoa Uelese Vaai, o faaiuga o mea nei o loo ile Pulega a le NPF le malosiaga latou te faamatuu ai na vaega tupe.
Ma o le mea moni lava o loo ia iloa o loo tupu e leo le faamatuu atu o le tupe, e leo le tupe foi, ae o le fesili e faapea, na uia e l’è taitaifono ma le Komiti faafoe Taiala ma faiga faavae a le SNPF e mafai ai ona talia nonoga tupe nei?.
Saunoa foi Lautimuia e leo se mea fou le faafitauli nei ua tulai mai na tupu muamua foi, ae faafetai i le au faigaluega a le NPF ua mafai ona faaleo so latou manatu ina ua maitauina se vaega ua faaletonu i totonu o le auaunaga a le NPF.
