26 Novema,2024 Samoa: Ua toe mafai ai nei e tulisi e afea le sina tele, poo le waterfall I Togitogia, ona malolo ai ina ua toe faaleleia le auala ma fale mapu iai tafaoga.
O foliga vaaia na sa iai ile silia ile 20 tausaga talu ai ao iai tagata faigaluega nofo mau ile siosioamaga o le eleele faasao i Togitogiga.
Peita’i o tapenaga o taligamalo o le CHOGM na molimauina ai le feilafi ma laumama, ae ole auala e fau i laupapa ua faapitoa, mo maimoaga a tulisi ile lauisiusi o le meamata ole togavao faasao i Togitogiga.
Ua toe saogalemu foi le auala savali i luga ane o le auvai, faatusa I tausaga ua tuana’i e asa le vao ma maseesee le ala atu ai ile taelega loloto e faamalumalu ifo e le fue inu mai laau ole vaomatua pei o tufaso ma tavai, papata, fu’afu’a, ifi, o fasa, ma le toganiu ua paoga ma matagofie ai tafavai.
O le loto lea i Togitogiga, e tala lasi ma aave ona ia foi tala e manatua ai pea e taelega ma tafaoga a o tatou lava tagata.
Peita’i ole tala faalauaitele mai le pulega o tulisi Samoa, ole toe faaleleiga lea ua iai nei ma foliga vaaia ua molimauina o le faafaigofie ai lea ona afea ma uia e tagata tafafao, maimoa, aemaise o lona saogalemu.
O suiga ua faatino, e aofia ai auaunaga sili ona mana’omia pei o fale malolo iai, fale e sui ai ma fale ui tulou.
Ae o foliga vaaia o le faataua e Samoa o ana ‘oa faanatura, i punavai, vaitafe ma togavao, ae o meaola o faamautu iai pei o manufelelei ma manufetolofi, faatasi ai ma taumafa maua mai vaitafe e iai ulavai ma tuna.
Ua toe afe gofie ai nei ma tosina tafaoga ile faasao I Togitogiga.
