Ua faamaonia mai e le susuga i le faatonu lagolago o le falemai tele i Motootua le susuga ia Tagaloa Dr Robert Thomsen, i le polokalame faapitoa a le Matagaluega o le soifua maloloina le siitia o le fuainumera o le mamalu o le atunuu ua aafia i le faama’i o le fiva ponaivi poo le Dengue Fever.
E tele faama’i e mafua mai ona o vairasi e feaveai e namu, peitai o le tasi lenei o faama’i ua iloga foi talaaga e le gata i totonu o Samoa ae o le Pasefika atoa.
Saunoa Tagaloa i le maea ane o suesuega a le fale su’e toto ma nisi o test sa faatino, ma faamauina ai le toe amata ona aliae mai o lenei faamai i totonu o Samoa.
“O le faamai lea e mafua mai vairasi feaveai e namu, ma ua maua mai faamaumauga i le tatou fale sue toto ua siitia le fuainumera o le atunuu ua aafia”
Ua alai ona faaigoa lenei faamai o le fiva ponaivi, aua o auga muamua lava na e aliae mai o le ova o le fiva mo le umi e lua i le tolu aso, sosoo ai lea ma tiga o soona o ponaivi.
E aofia ai foi ma le faafaufau poo le fia puai, ae muliai ai le pata o le tino.
O le fautuaga a le Matagaluega o le soifua maloloina i le mamalu o le atunuu ia faamama tafa fale i otaota ma atigi apa e ono to’a ai vai ma afua ai ona tau tuufua namu o loo feaveaia lenei faamai.
Ae le gata i lea ia ola tu mama i totonu fale i vaega e ono tau tuufua ai namu ma le pefu.
