E tolu tausaga lea ua toe ave ai le faatuatuaga a le Kapeneta i le afioga ia Tanuvasa Olo’apu Petone Mauga e na toe faafoe ai le Pulega o le Tineimū ma Fa’alavelave Fa’afuase’i (S.F.E.S.A.) e pei ona fa’ai’ugāfonoina e le Kapeneta i lana Fonotaga i lenei vaiaso.
O Tanuvasa, ua loa lona silafia ma ona tomai fa’apitoa i le auaunaga tau Leoleo patino tonu i luga o va’a a leoleo o lo’o puipuia le gataifale, le Nafanua, e pei ona avea ai o ia ma Ta’ita’i Leoleo i lea va’a i le tele o tausaga.
I le 25 o tausaga o lana tautua mo le Mālō o Samoa, e 16 tausaga sa galue ai mo le Matāgaluega o Leoleo, a’o le’i se’e atu ma ia tau’aveina tofiga o le Sui Komesina i le Vaega o Auaunaga Fa’apitoa ma le tali atu i Fa’alavelave Tutupu Fa’afuase’i mo le S.F.E.S.A.
Sa a’oa’oina mai le Ā’oga Tulaga Lua a Malifa, soso’o ai ma Leififi Intermediate, Kolisi o Avele, Iunivesite Aoao o Samoa (N.U.S.) ma fa’aauauina ai ana a’oa’oga i le Kolisi ale Australia’s Maritime ma le Kolisi o le U.S. Naval i Rhode Island.
O le lua ai lea o nofoā’iga soso’o ta’itolu tausaga a Tanuvasa i lea tofiga tāua o le Mālō.
