Ua amata su’esu’e e le Faamasinoga o Fanua ma Suafa i le talosaga a le afioaga o Afega ina ia aveese uma tagata o lo’o nonofo i luga o fanua, o lo’o pisa ai le afioaga o Levi ma Afega.
O I latou o lo’o iai a latou fale ma toaga i luga o nei fanua e aofia ai Ma nisi mai Levi Saleimoa, o nisi mai Leauva faatasi ai ma Lotoso’a I Saleimoa.
E tolu itu o le faamasinoga peitai, o nisi o le afioaga o Lotoso’a e lei silafia lea faamasinoga, ua tuuina atu a latou talosaga i le faamasinoga pe mafai ona faaulu a latou itu ona latou te lei iloa lea mataupu.
O le vaiaso ua tuanai na folasia ai e le Peresetene o le Fa’amasinoga o Fanua ma Suafa le faaiuga i le mataupu a Afega ma Levi lea ua manumalo ai Afega, lea la ua talosaga Afega ina ia aveesea loa tagata o lo’o i luga o le fanua ae sei faaauaua a latou galuega.
