E silia i le 3afe alii ma tamaitai, o fanau aoga , o taitai, o matai o aiga, o faaulu o matagaluega, e aofia ai ma failotu ma le taitai o le malo, afioga i le Palemia Fiame Naomi Mataafa, na omai faatasi ai ile taeao o le aso, Gafua 28 o Tesema e tatala aloaia le sao o Samoa ile taua faalevaomalo, a atunuu o le lalolagi, ile taofia lea o sauaga faasaga i tamaitai ma fanau.
Na tamua lenei sauniga faapitoa i le solo poo le savali uliuli , mai le ofisa fuimu i Apia, taamilo i le uati ma auai faatasi i luma maota o le malo, mo le sisiina ae o le fu’a o le saolotoga o tagata Samoa uma.
Peita’i o lena sa’olotoga e le’o mafai ona maua e se vaega tele o tina ma tamaitai o le atunuu. Pei ona molimauina i faamaumauga a le Toomaga mo e Puapuagatia o aso uma.
O se vaega o na faamaumauga, lea na faaleo e le Minisita o Tina ma Tamaitai, Leota Laki Sio, ma le tapenaga a le Matagaluega o Tina ma Tamaitai a’o faalapotopotoga tumaoti ua afua ai le savali uliuli i le aso:
“ E momoli atu ai le feau, aemaise o le faalauiloa i le Aso, mo aso e 16, “Malu i Fale”
O le anofale atoa o lenei faamoemoe, o le taumafai le a e avea Samoa ma atunuu saoloto mai sauaga i tina ma tamaitai faapea fanau i aiga.
E le’o na ma le laina le sosolo faaafi, ma le alu faafaamai o lenei faafitauli i Samoa. Ma agatonu a le taumafai a le malo, faaauala atui le Matagaluega lenei, ile faamaite, e fesoasoani ai ile itupa o alii, e foia lenei faafitauli mataga.
O le suesuega o le saogalemu o Aiga, i le tausaga e 2000 na faamaonia ai e 46 pasene le aofai o tina na sauaina e latou taitoalua, i le taimi atoa o latou faaulugalii”
Toe fai ile 2017, faamaonia ai ua oo i le 60 pasene tina ua sauaina, i taimi atoa o mafutaga faaulugalii. O lona uiga, e 14 pasene ua siitia ai lea fainumera i totonu o le 17 tausaga. Ose siitaga maoa’e, e tusa ma le 90 pasene o fanau na sauaina foi.”
O lona uiga a tolu pe lima se fanau ise aiga, e aafia uma lava latou i sauaga . E foliga mai a toe fai se isi suesuega, e ono toe faailoa mai le alu i luga o lenei fainumera.
E lata i le miliona tala ile tausaga tupe faaalu i le tausaga e ala i lenei taumafaiga, ae leo fua mai ise tulaga e tatau ona iai. Ua manatu ua tatau ona fai se isi faiga, lea ua laei uli mai ai nei.”
