Ua tu matila mai ai nei le poloketi miliona tala a le itumalo o Falealupo. I lona faaaogaina, ua matua iloga ona aoga i tagata uma lava, pei ona ave iai le faamuamua a le malo.
O Falealupo lea ua mautinoa lava le uu tupe.
E le gata o tupe e maua mai ile faatauga o le latou pasi, lea ua fealua’i e la’u tamaiti aoga ma isi Malaga e mana’omia ai le pasi. Ae ua uu tupe foi le au fai faatoaga ole itumalo, o aiga uma lava e naunau e fia atina’e, ua agavaa i na faamanuiaga.
Pei ona lipotia le faitau aso o alu asiasiga a le komiti faaitumalo o Falealupo e asiasi faatoaga ma atina’e a aiga.
O le metotia, a Falealupo e uu tupe ai lona itumalo, ole totogi ole aufai faatoaga, talo, taamu, koko, niu, ava ma isi.
Pei ona molimau mai e le afioga a Seumanutafa, e silia I le 20afe tala le tupe ua uu nei e lesi fai maumaga , mai lana to’aga e silia foi ile 20afe tiapula.
E $1tala lava ile tiapula ua toto I le eleele. Faapena foi i ‘ava, niu, koko ma isi e ese foi o latou tau faatatauina.
O maumaga ma atina’e lea ua faaalu ai le miliona a Falealupo, pei o le togatalo, lea e 24afe tiapula, e oo atu ia Setema ole tausaga nei, ua fafai ma faafaatau atu I maketi lea ua tapena atu e le Matagaluega o Faatoaga.
Ma toe maua mai ai isi tupe e sili atu ma faaauau ai e na tupe ona siitia le soifuaga o aiga , e le gata o le fau ai o fale lelei ae o isi atina’e.
Ma faatali lesi foi miliona e una’ia ai le faaauau ai lava ona tupu le tupe maua I aiga ma saga siitia ai le soifuaga o aso uma i le itumalo o Falealupo..
E le’o tutusa le itumalo o Falealupo ma isi itumalo I Upolu nei. O loo faaalu tupe a itumalo e faatau ai tiapula e ave i nuu, pei ona faia e le itumalo o Faleata lua.
Na tufa atu iai tiapula faatau mai i isi faifaatoaga i tua ina ua le lava se tiapula e maua atu i le Ofisa o faatoaga. Ma uu tupe ai foi na fai maumaga na faatau ane ai tiapula i Upolu nei mo Faleata 2.
Peita’i i le itumalo o Falealupo i Savaii, lea o loo faipule mai ai le Afioga a Fuiono Tenina Crichton, e le gata ina faaalu le latou tupe e faatau ai le pasi, ae ua avatu tupe I lima o tagata o lona itumalo fua i faamaoniga o faatoaga eseese ua atinae ai fanua.
Ae o saunoa Seumanutafa ole matai foi o Falealupo, ose faamama avega i matua le maua ole pasi, e o ai fanau aoga. Sa tausavali lava isi tamaiti, ma nofo a’oga isi lalata ile a’oga.
Peita’i o le iai o le pasi, o le’a mafai ai e na fanau ona toe mafuta ma matua, fai meaaoga I le fale. Ma faato’a usu lava ile taeao, ile taimi e alu ai le pasi.
O pasese o tamaiti, o le’a faaaoga mo le tausiga lea o le pasi i aso uma.
