O le tausaga muamua lenei ua faamanatu ai e le Pulega o tagata maimoa mai fafo le Aso mo tagata turisi e asiasi mai i Samoa, pei ona iai le aso Lulu o le vaiaso nei.
Na valaaulia ai aoga a Ekalesia e silia ma le 5 e aofia ai ma se vaega o le Iunivesite, sei faasoa i fanau nei le faatinoina o auala ma vaega o le auaunaga faatali malo e mailei ma faatosina mai ai turisi e le gata o Samoa ae o faletalimalo.
Pei ona saunoa le Ofisa sili ole Pulega o tagata maimoa mai fafo ia Pativaine Petaia Tevita, a unaia fanau i tomai e atinae ai pisinisi ma ave i fanau metotia fou.
Ia o le a faigofie foi la ona latou iloa auala e maua ai seleni ma manuia lautele moi latou i le lumanai.
Na ia ta’ua ua avea lea aso faapitoa o se auala e toe fafagu ai i tagata Samoa, le taua ole mataituina o se siosiomaga mama ma soifua maloloina, ina ia siitia le tulaga ole atinae e aofia ai Faletalimalo, Faleaiga, o matafaga ma isi.
A galulue faatasi la tagata matutua e faalautele ma faamalamalama i fanau i le taua o lenei auaunaga ma tele manuia e maua mai ai, o lea mafai ona faaopopo le isi laasaga o lea finau ai le tamaititi fai pisinisi e na te laasia.
