Faafetaia e le Minisita o Faatoaga ma Faigafaiva , Laaulialemalietoa Polataivao Leuatea Fosi Schmidt, le itumalo o Anoamaa 1, mo lana ulua’i seleselega i le Aso Toonai na te’a nei, 21 Ianuari 2023 ma le taunuuga ua iai nei lea faamoemoe mo Samoa atoa.
“Ana leai ananafi e le taunuu le aso, ise taunuuga faapenei. O le faafetai tele i le tofi o le Itumalo, Alai’asa , i le tapena ai ose taeao faapenei, sei faasolo polokalame ale Matagaluega o Faatoaga ma FAigafaiva, ae o le malo.
O lenei aso, ua potopoto i le alofa ole Atua, se’i amata se polokalame fou, O le Ulua’i Seleselega mo itumalo uma o Samoa. Taimi muamua sa agai uma atu i Apia, e taufai se faaaliga tuufaatasi.
Sa tele ina le avanoa iai fai faatoaga ma faiva. Ae o le faiga fou lenei o le faatino o le Ulua’i seleselega a le Itumalo lava latou, mau avanoa iai tagata uma.
E faamauina pea le agaga faafetai, i le tali valaau a le alii faipule ma taulamua e faatino le Ulua’i seleselega. E lima tausaga o le nofoaiga, lona uiga e lima Ulua’i seleselega e faatino.
O le faamoemoe o le malo, ia faasoa atu le tamaoaiga gafataulima ina. Ia faasoa atu le tamaoaiga o le malo mo faatoaga ma faifaiva se le oo atu iai muamua.
O luitau o afa ma matagi, ae o faama’i, ua fevataua’i atunuu tetele o le lalolagi, ma siitia ai tau o oloa e pule ai latou, pei o suauu, kiso kalasini ma le penisini.
Ae o oloa o loo faamoemoe iai o tatou soifuaga o aso uma. A siitia mai fafo ua afaina oloa o loo tatou faamoemoe iai i aso uma. Ona manatu ai lea o le malo, pe faapefea ona tatou foia nei faafitauli ua tatou iai.
O le tali ile pisa o le taugata o le soifuaga o tapisa nei, O le Ulua’i seleselega ua iai i le aso. Peita’i o le tofa o loo i o tatou lima lava le fofo mea nei. Ia tatou toe agai e fai le mea sa masani ai, o le tagi i lima ma osi taulaga, tatou toe fo’i e toe lalaga le tamaoaiga o Samoa o taoto i ona tuamaota ma laoa.
O mea aano ma mea lelei e ina’i ai. O lenei taeao, o loo tuufaasolo pea le galuega, i itumalo taitasi o le atunuu, ina ia faaauau pea le manulauti, e leai se isi tatou te faatuatua ia, e tatou te faalagolago lava tatou ia tatou. O tatou lava e tapena mea sili mo itumalo, i aiga nuu itumalo ma Ekalesia. O le ano faavae o le malo, o le tutu faatasi ma galulue faatasi.
Ia mau le atunuu i mea uma, pei o meaano, pei ona molimauina i le aso.
Tatou toto talo, fai , taamu, ufi, ava ma soo se ituaiga faatoaga e maua ai le tamaoaiga ma le taumafa a le atunuu, o mea uma na ua tatau ona toe agai iai. Ia gafataulimaina.
E le i lalo ifo le 60-70 pusa oloa o moa o le masina o loo tatou taumamafa ai. Peita’i o loo gafataulimaina pea ona fai tulaga masani, fafaga moa ma puaa, mamoe manupapalagi ma isi aano o manufasi e mafai ona maua i Samoa.
Faapena foi i le gataifale, o faafailele faisua, alia’o,, limu fuafua, kilapia ma isi. O le agaga ia gafataulima ina tatou mo tatou.
O le talitonuga o le malo, e le mafai ona taunuu mea nei pe’a le galulue faatasi ma apefoe faatasi. o le agaga lena o le taeao ma le aso, o ole’a agai sa’o mai le Matagaluega e fesaga’i ma le itumalo, e momoli mai fatulaau, o mea faigaluega, e limata’itaina ai le agai i le lumana’i.
O le tatalo foi a le Matagaluega, ia fetalia’i lagona ma manatu, faamolemole ia faailoa atu fafitauli ma tulaga o mana’omia.
O le tatalo e ala atu i le Faipule ma le Komiti ole fono faavae, o le amataga fou lenei o le a lalata ole itumalo ma le malo. Ua taatia atu foi le miliona tala, e faafetai ai le Itumalo o Anoamaa 1 i le lagolago , e faafetaia ai le paia o le itumalo.
Ae ia lilifa le silasila i atina’e o faatoaga, faiva ma lafumanu.”
O sasa uma lava nei o le samiina o le 60 tausaga o le Malo tutoatasi o Samoa, lea ua toetoe ina tofu itumalo ma o latou sao i auala esese o faafiafiafiaga e auai faatasi ai.