O fa’afitauli i le Tau ma le Soifua Maloloina ma Auala e foia ai, o le manatu autu lea o le Fonotaga a le faalapotopotoga le OBSA poo le Oceania Biblical Studies Association.
Sa ususia i le aso Lulu o le vaiaso nei i le lotoa a le Ekalesia EFKS i Malua, ma saunoa faapitoa ai le tamaitai Palemia le afioga ia Fiame Naomi Mataafa e tatala aloaia ai le fonotaga.
O le OBSA, o se fa’alapotopotoga na fa’avae e nisi iloga i Mataupu tau le Tusi Paia i le Pasefika, e fefa’asoaa’i ai i auala fa’a-Pasefika e su’esu’e ma fa’auiga le Tusi Paia.
O le fa’amoemoe o lenei fa’alapotopotoga, ina ia fa’alautele le vaai i le Tusi Paia, e fa’ataua ai vaaiga mai i o tatou lalolagi, ma siosiomaga fa’a-Pasefika.
Ae le gata i lea, o le fa’atauaina o le tapu’e fa’a-laau ola o le poto ma le atamai fa’asu’esu’e o le Tusi Paia i le tatou itu-lagi.
Sa auai ai nisi o tagata su’esu’e o le Tusi Paia ma le Mataupu Silisili o le lalolagi, e pei o sui mai Aferika i Saute, Amerika, Ausetalia, Niu Sila, Filipaina ma atunu’u o le Pasefika e fefa’asoaa’i, e ala i pepa ua sauni e talanoaina.
Na momoli ai le agaga fa’afetai o le afioga i le Palemia e fai ai ma sui o le Malo o Samoa, i le OBSA ona o le tofa na a’e, e fa’avae ai lenei mafutaga a tagata su’esu’e o le Tusi Paia o le Pasefika ma le lalolagi.
E fa’ataua ai le sailiili i le Afioga a le Atua, ina ia fa’atumauina le avea o le Atua Tolutasi Paia, ma fa’avae i olaga, e le gata o tagata Samoa, ae fa’apea foi le Pasefika.
