I faamaumauga o le tau mai le Ofisa o le Vaaitau i Mulinuu e sootaga i uiga louloua o le tau ua iai nei, ua si’itia le tūlaga lamatia o Sāmoa mai i Matāgi Afā, ma ua fa’apea ai le va’ai mamāo, e Lua i le Tolu (2-3) Matāgi Afā e ono alia’e ma pāsia, pe sopo’ia fo’i le 400 kilomita i fafo atu o Sāmoa i lenei Vaitau Afā
E iai le avanoa e ono la’asia ai e nisi o nei Matāgi Afā le Vāēga Tolu (3) pe sili atu foi mo lenei Vaitau.
O le Vaitau Afā e amata mai iā Novema 2023 se’ia pā’ia Aperila 2024. O le masina o Ianuari aga’i atu ia ia Mati, o masina aupito i sili lea ona mā’ale’ale i le āfuāga o Matāgi Afā mo Sāmoa
O le taimi nei, o lo’o feagai le Vasa Pasefika ma a’afiāga o le Ele Nino, ma maualuga se avanoa e fa’aāuāu pea nei a’afiāga i le fa’asolo atu i le amataga o le 2024.
O lo’o valo’ia le fa’aitiitia le faitau aofa’i o timu fa’amauina mo Sāmoa i le 6 masina o amatalia nei
E ōno si’itia maualuga vevela o le ‘ea nai lō o tulaga māsani mo Samoa mo le vaitau Āfā.
E maualuga se avanoa e a’afia ai Samoa i a’afiaga tau Lāmala (Tu’iēfu), aemaise lava i nofoāga mā’ale’ale i nei mala fa’a-le-nātura Ia mautinōa ua amata ā tatou tāpenagapenāga mo le Vaitau Afā lea ua tatou ulufale atu ai, mai iā Nōvema 2023 aga’i atu iā Aperila 2024.
