Ao loma ai le masina ole fonotaga a le Taupulega lea e faia mai i Samoa ile masina o Oketopa, oloo faaauauina pea nisi o aoaoga ma tapenapenaga o toleniga a i latou oloo ofo atu lo latou fesoasoani i galuega fai olea faasauni atu ai le Ofisa o Leoleo Falepuipui ma le Ola Toe Fuataina ile taligamalo aua le fonotaga ole CHOGM.
Lea e iai le aso ananafi, na faatautaia ai e le Ofisa o Leoleo Falepuipui ma le Ola Toe Fuataina ( SPCS ) se sauniga puupuu ae taua tele e faailoga ai le amataga ole taamilosaga lona fitu o aoaoga a sui lagolago.
O lenei a’oa’oga ose vaega o taumafaiga faifaipea a le SPCS ina ia mautinoa le lava ole lagolagosua ile fonotaga a ulu o malo ole Taupulega ( CHOGM ).
E oo atu ile 52 le aofai o atunuu ia olea malaga mai mo lenei fonotaga olea faia nei.
E taua tele le sao o sui nei e fesoasoani ile SPCS ile taimi kle CHOGM, ma o lenei a’oa’oga ua mamanuina ina ia faaa’upegaina ai i latou ile poto ma tomai talafeagai. Olea aoaoina i latou oloo auai i a latou matafaioi faapitoa ile taimi ole faamoemoe ma maua se aotelega ole faavae faaletulafono e faatonutonu ai o latou tiute.
Na momoli le agaga faafetai a le Ofisa o Leoleo Falepuipui ma le Ola Toe Fuataina i sui lea na mafai ona auai atu i nei aoaoga oloo faatautaia, aua ole faanaunautaiga lava ole Ofisa ia mautinoa lava olea latou saosaolaumea ile sologa lelei aua le saogalemu ole fonotaga o ulu o malo ole taupulega lea e talimalo ai le atunuu ile masina o Oketopa.
